Tällä viikola saima vihoin ja viimein sen olkkarin lattian lämmityksen korjatuksi. Tai korhjautetuksi. Roista tuli joku lämpökameran kans heiluva sähkömies ja paikallisti vian yhtheen liitoskohthaan, onneksi vain yksi laatta tartti irrottaa ja sen alta piikata betonia auki. Semmosessa viien sentin syvyyessä oli liitoskohta, jonka ukkonen kesälä hajotti. Muuten se sähkömies kehu kovasti sitä johtoa, joka lattiihaan on laitettu. Sano, että soon ikusta, mutta että nuot liitoskohat voi joskus toisteki joutua uusimhaan. Niiton kuulema kaksi, ja noon siinä aivan lähekkäin olemassa.

Löyty muutama nuita laattojaki vielä ehjänä, muttei saneerauslaastia. No mie tieten Kyöstin puhheile Värisilhmään, että tämmönen olis nyt ongelma. Kyöstilä oli vain 15 kilon säkkejä laastia... ja siinä kerethiin kaiken maailman liimausvaihtoehokki hunteerata, kunnes se sannoo yks kaks, että "Ei kuule, oota vähän. Mie aukasen yhen säkin ja otan sulle kauhallisen sitä laastia." Ja niin se teki. Pisti pakastepushiin mulle laastia kauhallisen ja vähän enämpikki.

Hinta? Ei mithään. Sanonko poka pikkusen palveluksi! Ja soon muuten tehny saman saumauslaastilekki joskus aikasemmin. Ja jokku multa kyssyy, miksen mie osta Rautixista.

Tänhään sato lissää lunta sillain oikeala laila. Justhiis niin ko lunta häätyy sattaakki.

Tekkee talvea. Mutta ei haittaa, hamstereila on hyä olla (meilon lainassa Huovisen Hamsterit kirjastosta DVD:nä).

 

On piely sen verran miinusastheita, että kissakki nukkuu mieluumin päikkärit sisälä ko ulkona. Arvaa, kumpi on kumpi? :-)

 

(On siinä kaksi.)

 

Raijala oli Friendtex-kutsut ja tyärtä kaivathiin malliksi kokkeilheen. En sortunu osthaan yhthän mithään,  mutta se Nina kysy, onko tyär tykäny niistä, mitä viimi kevhäänä ostethiin. Vastasin myöntävästi. Raijala oli hyyää tonnikala-katkarapupiirakkaa ja sienipiirakkaa. NAM!

Ennen saunaa kävin vielä hautuumaala ja kuntosalila (tässä järjestyksessä). Mie olen aina tykäny käyvä hautuumaila, noon jotenki niin rauhallisia ja kauhniita paikkoja. Enämpi kylläki olen käyny kesäsin ko talvisin, mutta talvela on kaunista, ko ihmiset käypii pistämässä kynttilöitä hauvoile. Mieki pistin. Koska kukhaan ei lähteny mulle kaveriksi, otin vain yhen kynttilän ja pistin sen näitten sekhaan:

 

 

 

Molemille isovanhemille yhteinen kynttilä.

 

 

 

Eikö vain olekki kaunista?

 

 

 

Laura täytti tänhään 20 ja huomena olis tarjola kakkukahvia.

Saana tullee 18. päivä joulukuuta ja on jo tilanu "kaikkea, mitä jouluna ruukaa olla perintheisesti tarjola" :-)