Olkkarin lattialämmitys on rikki. Siihen jos pannee virrat pääle, se poksauthaa sulakheen rikki. Termostaatissa ei ole vika, sen jo vaihatimma kokkeila toista tilale. Saattaa tietää lattiaremonttia. Laitamaan Kyösti lupas tulla heti ko kerkeää, mikä tarkottaa toivottavasti ennen lumia ja pakkasia.

Viuhtia on näkyny viimeksi eilen illala. Ei kuulu ei näy. Ei tule, kortto, vaikka kuinka huutaa :-(

Kävin terveystarkistuksessa ja mulloli hullun korkea verenpaine. Tosin justhiis kahvipöyästä nousheena, mutta silti :-O
Jösses.

Aku alotti NAJM-karkitten teon (siirappia, maitoa, voita, kaakaota ja ...hmm... jotaki) paistinpannule. Sitte soitti Aapo ja pannu siirethiin jääkaaphiin oottamhaan aikaa parempaa. Joka on ties milloin.

Iskän pyssykaappi on pintakäsittelyä vaile valmis.

Huomena on perjantai, ja jos mennee suunnitelmitten mukhaan, menhään Akun kansen kattomhaan Pieni kansani laulu -esitystä. Sitte vois mennä mökile yöksi ja lauantaina mustikhaan. Tehimä eilen annoksen mustikkarahkaa ja söimä sen kahtheen pekhaan saman tien. Aku tosin meinasi, että olis ollu parempi muusata mustikakki eikä jättää niitä kokohnaisina. Minusta nolit hyviä jushiis nuin.

Pitäs tehjä yhtä sun toista, mutta työt haittaa harrastuksia. Huomena kuiten kuntosalile porukoitten kansen (pistimä pysthöön vaimoitten kansen oman kuntosaliköörin, on hauskempi käyvä yhessä.)

Marja-Leenalta kovasti terhveisiä sinne Belgiihaan. Se sano, että  hälläki on ollu niin outo tehjä töitä, ko on aivan yksin. Ko ennen aina on tyär jossaki välissä kömyny kuiten alakerthaan, ja on niinko ollu toinen ihminen talossa koko viimi talven oikeasthaan. Mie lupasin kertoa.

- - -

vielä 48 viikkoa ja päivä, pari

- äiti -